Au Brouillon

           Men ni ! Men ni! Men ni! Men bebe a, jodi a m'ap abòde l kanmèm... m ap suiv li lontan. Je m tonbe sou li preske chak jou, nou fè menm wout pou nou al pran machin pou ale lakay nou lè n ap sot nan fakilte. Nou toujou kanpe anba menm ponp sou "lalue" a. li gen pou l pran machin pou l ale kriswa, mwen menm m pral Petyonvil.

          Bon, pouki m pat rete kriswa menm jan avè l... Nou ta monte menm machin petèt, li te ka chita bò kote m.

         Si nou ta wè ti lezanj lan. Foto l ta sipoze bò kote mo "ange" nan yon diksyonè ilistre. Bèl po, bèl tèt bouch, toujou fre ... Se sa yo rele biblo a san dout. An verite, sa a se yon timoun Jezikri dizay dimanch pak lè li resisite a, li te sou san l. Moun pa konn bèl konsa mezanmi ....

          M pa kwè m se sèl grenn foumi dèyè po myèl sa a. Si nou ta wè rara m fè pou li: lè m poko lokalize l, m tankou yon chen kaka kenbe, mwen an ponmzenk e lè m wè l menm; defile moun fou a kòmanse. Si li dèyè m, m ralanti, pran pòz m ap lase tenis ... Manti wi, m jis bezwen kite l pase devan. Sant pafen l toujou banm yon karès. Ou kwè ti pitit santi bon sa?! waaaw. Jodi a wè pa wè m ap pwoche. M tann twòp.

          M bay yon mòp ale-retou pou bouch la pa parèt blanch epi m pran wout la. M pwoche pi pre. M timid anpil men ... Sa se fiti madanm mwen, manman twa pitit mwen yo. Fò m mete tout timidite sou kote e al pran bebe a. M pa gen twòp tan, li ka pran machin pou l ale.

         M veye anwo, veye anba m pran souf epi m rive:

  - Bonswaaa !!!

  - Bonswa jeune homme…

  - Eskize m si m deranje w men mwen te jis vle di w yon ti bagay … fè m kado yon minit nan tan w si posib.

         Li gade m, li souri epi li reponn

  - Evre ? Ebyen pale non…. M ap tande w jiskaske yon bis kriswa pase pou m ale.

  - Wi wi … m ap brèf. Mwen te jis vle di w ke m twouve w vreman bèl epi m pran feeling nan ou. M renmen wè w e se yon plezi pou mwen pou m gade w k ap pase.

  - Aaaahhh se pou sa ou plede suiv mwen konsa a? Tankou polisye k ap siveye zenglendo a ?

  - Woy !!! ou konn wè ? m pat panse sa, pou jan m fè atansyon…

  - Wi … M bare w k ap gade m plizyè fwa.

  - An palan de zenglendo … poukisa papa w vòlò tout zetwal yo li mete nan je w ?

Li bay lari a do l kounya. Mwen te espere tout machin kriswa pran nan yon gwo blokis. Jis pou nou rete plis.

  - Waaawww !!!! M potko tande sa a non…. Intéressant !!! merci… siman se paske li renmen pitit fi l anpil e li chèche sa ki pi bon pou li… ou pa t ap fè parèy pou mwen ?

  - M anvi kase kèk kote pou ou vre wi … men se pou pita. Je peux connaître ton nom ?

  - Samantha …

  - Samantha tu es vraiment belle !!! Bondye ba w tout bagay …. Sof nimewo telefòn mwen.

  - Mezanmiiii !!! tu es tout un numéro toi ….

  - En fait 8 …. Comme le nombre de chiffres de ton numéro de portable.

  - Petèt ke m ap ba w li, petèt se bondye k ap voye l ba w, sa w panse?

  - Se li an pèsòn ki voye m mande w li wi.

  - Kidonk, Bondye se zanmi w ? ou gen kontak li …

  - Non … papa m …. papa nou !

  - Rele l pou mwen non pou m pale avè l … m bezwen pale avè l pou m mande l si se ou li voye pou mwen an. M te mande l yon mennaj, yon bèl ti mennaj.

  - M pa kwè m ap jwenn li non a lè sa a. li nan reyinyon …. Organisation des affaires célestes yon bagay konsa !!! men si se mwen li ta voye vre ou t ap « déçue » ?

Li ri …. Ti dan l te byen fèt. Chak segond ki pase avè l m t ap tonbe damou plis.

  - Je dois avouer que tu n’es pas mal.

  - Pas mal … donc assez bien pour avoir une chance ?

  - Possible ….

         Yon machin kriswa vin ap pase, kè m bat fò m panse l ta prale …. Men li kite l ale.

  - Ou pa gen anyen ou t ap ajoute ?

  - Si se pou di… m chaje pawòl pou m di … men pwoblèm nan se kijan pou m chwazi bon mo yo.

  - Alors comme ça tu es un envoyé de Dieu ? ou pa timid ditou.

  - Byen okontrè …. M timid anpil. Menm mwen m sezi sa ki ap fèt la … si w pat okipe m m t ap endispoze lè konsa.

  - Depi kilè w ap suiv mwen menm ?

  - Depi premye fwa je m tonbe sou ou a …. ou te mete yon ti « jeans noir », yon ti mayo bleu, yon ti soulye plat epi linèt solèy. ou te penyen yon ti chou ke chwal jou sa a … Sa gen 3 mwa m kwè.

  - Mwen konn pran abiman sa vre wi. A vraie dire, mwen te remake w tou ... nou fè menm wout prèske chak jou pou nou al lekòl. Tu ne me laisses guère indifférente … Ou pa mal ditou. Ou gen bèl ti zye, yo te ka fè malè si w te byen itilize yo.

  - Ah bon !? merciiiii…. mwen ki te panse m toujou pase inapèsi nan lari a … antouka, m kontan ke w te remake m.

  - Ou konn fi pi entelijan ke gason nan sa a … Nan tout bagay dayè. Nou gade men nou fè kòmsi nou pa wè… M wè w e m pran tan pou m gade w. Kas ou toujou byen vise nan zòrèy ou, yon men nan pòch, lòt men an kenbe manch valiz la. Ou menm konn ap ri poukont ou … M te menm panse w manke yon demi fèy …. bilbòd !!!

  - Men koze … ou konn wè m vre !

  - E se kijan ou rele monsieur à qui il manque une feuille ?

  - …. Lolo pour les intimes !

  - On est déjà intimes alors…

  - Non, mais on va le devenir assez rapidement …. M kwè nan sa.

  - (li souke tèt li) Ou yon ti jan biza nan bon sans lan… Sa fè m anvi kontinye kotwaye w plis … Mwen ta renmen konnen sa k pral pase a.

  - Ah m kontan. M pwomèt ou m p ap desevwa w ... M ka gen nimewo w kounya Samoue ? N ap ka kontinye pale e konn lòt plis.

  - Ou twò prese Monsieur Lo ... Tu l’auras mon numéro mais se mwen ki pou deside ba ou li.

        Li kontinye bay lari a do l. Li fikse m pandan yon ti tan … Gade m soti nan pye rive nan tèt epi li di : “mwen pa pral fè anyen lakay mwen e pa gen kou demen. Ann gaye pou ti bout apremidi a. »

        Mwen pi wo pase l. Yon ti tèt, pa plis …. M atrap men l epi m depose yon ti bo sou men prensès la pandan m di l “ jis suiv mwen.”

Mwen pa di anyen ankò, m leve zye m pou m chèche yon taksi lage nou nan yon restoran, chans pou mwen m te gen yon ti kòb sou mwen jou sa a. Mwen kenbe men l, kè m kontan, m wè papiyon ap vole. Yon ti taksi vin ap pase….

  - Psst !!! psst !!! taksiii… M fè l jès pou li kanpe pou nou

Ala bagay se imajinasyon !!!

  - Psstt !

        Li rete yon machin kriswa epi li kouri monte li ale pandan ke je m pat sispann suiv li tout tan nou te kanpe a.

         Demen m ap pale avè l kanmèm. M espere konvèsasyon m te gen avè l nan imajinasyon m nan ap reyalize …. Fanm sa a se pou mwen li ye. M ap mete devwa m o pwòp … Demen si bondye vle

Demen vle pa vle …. Wè pa wè !!!

Men demen se te mèkredi….. mèkredi apre madi 12 janvye !!!

Inspiré d’une histoire vraie!!!